Cursos Celga nas escolas oficiais de idiomas

No DOG núm. 155, do martes, 14 de agosto de 2018, aparece publicada a Resolución do 2 de agosto de 2018, da Dirección Xeral de Educación, Formación Profesional e Innovación Educativa, pola que se convocan, con carácter gratuíto, cursos de linguaxe administrativa galega e cursos preparatorios para os certificados de lingua galega, Celga, que se realizarán en distinots períodos e en varias escolas oficiais de idiomas de Galicia.

https://www.xunta.gal/dog/Publicados/2018/20180814/AnuncioG0164-030818-0002_gl.html

Publicado en Destacados, Formación | Deja un comentario

Excursión de Avelaíños e Rebuldeiros ao Grove

Nesta ocasión, as familias de Avelaíños e Rebuldeiros de Negreira e Maimiños e Furabolos da Baña, aproveitaron o día 23 de xuño para percorrer a península do Grove da comarca do Salnés, en Pontevedra.

A primeira parada foi no Acuario do Grove onde puideron coñecer moitas das especies atlánticas de augas frías, quentes e doces da man dunha guía que non deixou de explicar polo miúdo todas as especies que se podían ver e algunhas delas tamén tocar.

O segundo lugar que visitaron foi a aldea de Grobits, uns seres que viven nas profundidades das augas termais da Illa da Toxa e que soben á superficie subindo por unhas gretas que conectan co pozo desta aldea. Alí os nenos e as nenas aproveitaron para xogar no parque e para visitar as súas casas.

Despois de xantar e de descansar tranquilamente na beira da ría, pasaron a tarde navegando en barco pola ría de Arousa. Desde a embarcación puideron ver as bateas de mexillóns, vieiras e ostras e tamén os fondos mariños. Este paseo completouse cunha merenda de mexillóns e cun baile que compartiron con turistas portugueses.

E antes de regresar a tempo para participar nas cacharelas de San Xoán, aínda puideron darlles a merenda aos nenos e ás nenas de menor idade.

Que ben o pasamos convivindo entre familias!

Publicado en Destacados, Dinamización | Deja un comentario

Aldaolado en Negreira

As poetas Lucía Aldao e María Lado trouxeron o seu espectáculo de poesía, música en directo e humor Cría fama e bótate a correr á casa de cultura de Negreira o pasado 21 de xuño de 2018. Nel puideron participar, de maneira activa, o alumnado e o profesorado do IES Xulián Magariños.

Quedou patente que conseguiron a implicación, a emoción e a risa do público asistente coa súa actuación chea de sinceridade e retranca.

Publicado en Sen categoría | Deja un comentario

Obradoiro de regueifa no IES Xulián Magariños

Sara Porrit, coa axuda da súa irmá Esther, impartiu un obradoiro de regueifa no IES Xulián Magariños o 19 de xuño de 2018. Este obradoiro estaba dirixido a alumnado de 3º de ESO e nel tamén participou o profesorado asistente.

Para poder regueifar, as alumnas e os alumnos aprenderon os tres segredos principais da regueifa:

  1. Cantar unha melodía.
  2. Pensar o último verso porque é aí onde vai a idea que queremos transmitir.
  3. Axudarse con palabras monosílabas como eu, nós, vós, te, che, vos..
E con estes pequenos consellos todas e todos pasaron un anaco de mañá a regueifar.

Publicado en Destacados, Dinamización | Deja un comentario

Musicreques na Escola Infantil Municipal de Negreira

O pasado 12 de xuño de 2018, Musicreques presentou o seu espectáculo Contacontos musicais na Escola Infantil Municipal de Negreira. Foi unha actividade englobada dentro do programa Ler conta moito; por iso,  estivo presente a biblioteca móbil para que o alumnado da escola puidese coñecer e/ou gozar cun feixe de libros en galego.

O SNL colaborou na xestión deste espectáculo, que foi unha mestura de narración oral con cancións, efectos musicais, manipulación de obxectos, rimas, monicreques e ilustración e que lle permitiu ao alumnado escoitar en galego contos adaptados á súa idade.

Publicado en Dinamización | Deja un comentario

Encontro das escolas infantís de Barcala 2018

O pasado 15 de xuño de 2018, o alumnado das escolas infantís de Negreira, Aro, San Vicenzo e Lañas participou no encontro anual que ten como obxectivo principal compartir unha xornada de convivencia en galego mentres coñecen os distintos lugares do concello da Baña.

O encontro comezou na casa da cultura do Concello da Baña onde Urxa, a trasno da biblioteca, aproveitou para saudar, lembrar o encontro 2017 e contar a historia de Cachafello, o seu amigo, trasno tamén, que vive preto do camiño para axudar os camiñantes.

Cachafellos

Tan pronto chegaron a Ferraces, organizaron cinco grupos formados polo alumnado dos distintos centros: o equipo verde buscou fentos polo camiño; o branco, flores; o rosa, follas; o amarelo, fiúncho e o azul, as frechas azuis que indicaban o camiño. Todo isto para axudar a Cachafello a recolectar ingredientes necesarios para as súas apócemas que curaban os camiñantes.

E partiron cantando unha canción para evitar que Cachafello lles entorpecese o camiño.

Somos os trasniños piños /e vimos a camiñar / chegaremos a Muxía /moi cansadiños de andar.

Temos xente da Baña, / Negreira tamén vén, / non faltan os de Lañas, /Aro anímase tamén.

Camiñando pola Baña / moitas cousas hai que ver / follas, flores e castañas / témolas que recoller.

O alumnado tivo que buscar en Ferraces por un agasallo sorpresa que lles deixou Cachafello agachado; para atopalo, axudounos con esta pista:

Encontraron o regalo enriba da escaleira do pazo de Ferraces; eran uns sombreiros para que protexesen do sol as cabezas.

Logo, arredor dos 112 alumnos e alumnas xunto coas súas profesoras percorreron un pequeno tramo do camiño de Santiago de Compostela a Muxía no seu paso por Corneira.

Despois da camiñada, non houbo nada mellor que un pequeno descanso no local social de Corneira para repoñer forzas.

Compartir camiño foi moi divertido!!!

Publicado en Destacados, Dinamización | Deja un comentario

Festa do Apego de Negreira e A Baña

O pasado 21 de xuño de 2018, as familias do Apego da comarca de Barcala e contorna puideron gozar dunha tarde de socialización en galego no refuxio de Covas. Non faltaron os xogos, o teatro, os libros da biblioteca móbil, un obradoiro de marcapáxinas, nin a música e o lugar, cheo de encanto e rodeado de natureza, non podía ser mellor para soportar a calor dese día de inicio de verán.

http://concellodabana.gal/index.php/inicio/nova/25-snl/726-as-familias-implicanse-na-primeira-festa-do-proxecto-apego-do-val-de-barcala

http://concellodenegreira.gal/index.php/gl/novas/nova/1222-festa-do-programa-apego-no-refuxio-de-covas

Publicado en Destacados, Dinamización | Deja un comentario

Andaina literaria polas Letras

O pasado 15 de maio de 2018, o CPI San Vicente participou na Andaina literaria polas Letras  que transcorreu polos lugares de Vilarnovo, Canlís, Fampousa, O Castro, Salvande, Xasoso, A Castiñeira e San Vicenzo co obxectivo de conmemorar o Día das Letras Galegas. O alumnado fixo varias paradas para ler textos da autora homenaxeada este ano, María Victoria Moreno.

Publicado en Dinamización | Deja un comentario

Taller de xornalismo deportivo

Francisco Rego González (Fran Cañotas), xornalista da Televisión de Galicia, impartiu un taller de xornalismo deportivo, que forma parte da campaña “O galego, a miña lingua propia” da Deputación da Coruña, no IES Xulián Magariños, o pasado mércores, 16 de maio de 2018.

Neste obradoiro participou alumnado de primeiro de ESO en horario de 11.30 a 13.00 h aproximadamente. Despois de explicar o uso do galego nos medios de comunicación, incidindo na parte deportiva, Fran Cañotas realizou unha demostración dunha narración de momentos deportivos. A partir de aí, foi o alumnado o total protagonista; primeiro animouse a comentar varios partidos tanto como locutores e locutoras de radio como de televisión e logo participaron nunha rolda de prensa, parte do alumnado actuou no papel de xornalista e outra parte, no de adestrador ou adestradora.

Para realizar a segunda parte do obradoiro, Fran presentoulle ao alumnado unha situación deportiva de gol que había que retransmitir; neste momento os e as participantes puideron lucirse como “verdadeiros” comentaristas. Na terceira parte, aprenderon a presentarse (nome e apelidos e medio de comunicación para o que traballaban) e a realizar preguntas interesantes para unha conferencia de prensa post-partido; por outro lado, tamén lles ensinou como respondelas.

A implicación do alumnado foi total desde o primeiro momento; o xornalista conseguiu a súa plena atención e, o que é o mellor para esta campaña, transmitiulle ao alumnado que o galego é unha lingua válida.

Publicado en Dinamización | Deja un comentario

Obradoiro de regueifa III interxeracional

A serie de obradoiros de regueifa concluíu o pasado mércores, 9 de maio de 2018, cun encontro regueifeiro interxeracional entre mocidade e persoas adultas; e, como non, rematou repartindo entre todos a regueifa, unha rosca, que acompañaron cun café.

https://www.youtube.com/watch?v=uXfY2hNbbo8

Publicado en Dinamización | Deja un comentario