Francisco Rego González (Fran Cañotas), xornalista da Televisión de Galicia, impartiu un taller de xornalismo deportivo, que forma parte da campaña “O galego, a miña lingua propia” da Deputación da Coruña, no IES Xulián Magariños, o pasado mércores, 16 de maio de 2018.
Neste obradoiro participou alumnado de primeiro de ESO en horario de 11.30 a 13.00 h aproximadamente. Despois de explicar o uso do galego nos medios de comunicación, incidindo na parte deportiva, Fran Cañotas realizou unha demostración dunha narración de momentos deportivos. A partir de aí, foi o alumnado o total protagonista; primeiro animouse a comentar varios partidos tanto como locutores e locutoras de radio como de televisión e logo participaron nunha rolda de prensa, parte do alumnado actuou no papel de xornalista e outra parte, no de adestrador ou adestradora.
Para realizar a segunda parte do obradoiro, Fran presentoulle ao alumnado unha situación deportiva de gol que había que retransmitir; neste momento os e as participantes puideron lucirse como “verdadeiros” comentaristas. Na terceira parte, aprenderon a presentarse (nome e apelidos e medio de comunicación para o que traballaban) e a realizar preguntas interesantes para unha conferencia de prensa post-partido; por outro lado, tamén lles ensinou como respondelas.
A implicación do alumnado foi total desde o primeiro momento; o xornalista conseguiu a súa plena atención e, o que é o mellor para esta campaña, transmitiulle ao alumnado que o galego é unha lingua válida.
A serie de obradoiros de regueifa concluíu o pasado mércores, 9 de maio de 2018, cun encontro regueifeiro interxeracional entre mocidade e persoas adultas; e, como non, rematou repartindo entre todos a regueifa, unha rosca, que acompañaron cun café.
https://www.youtube.com/watch?v=uXfY2hNbbo8
Na tarde do mércores, 09 de maio de 2018, Andrés Goteira (director) e Suso López (produtor e actor), que forman parte de Gaitafilmes, achegáronse ata o CPI San Vicente para darlle unha charla ao alumnado de secundaria sobre como empregar a nosa lingua en todos os procesos que envolve hoxe en día a realización dun filme e o seu uso no día a día dunha produtora audiovisual como esta que desde unha pequena vila galega, Meira, puxo a andar a longametraxe Doghs que foi rodada integramente en galego.
Na súa explicación, Suso destacou que fixeron “un proxecto en galego para todo o mundo e isto non foi un problema senón que se fixo forte desde abaixo, empezando no noso pobo e rematando na comunidade”; pola súa banda Andrés puntualizou que “é moi bonito traballar desde un lugar como Meira, cos amigos de toda a vida cos que xoguei ás agachadas e, ao mesmo tempo, rodearse dun equipo técnico e profesional e estar tan apoiado”.
Despois da charla houbo un coloquio co alumnado que se mostrou moi interesado. A actividade posterior consistiu nunha pequena práctica de cine, a posta en marcha dunha escena en colaboración co alumnado que ocupou os diferentes roles que hai na rodaxe dun filme: cámara, dirección, auxiliar de dirección, continuidade, sonidista, pertiguista, arte, foto, actores ou actrices… O guión estaba previamente preparado para facer unha rodaxe sinxela, como un diálogo con dous ou tres planos.
Esta actividade está encadrada dentro da campaña de normalización lingüística “O galego, a miña lingua propia” que está a desenvolver a Deputación xunto coa colaboración dos concellos e que ten como principal obxectivo promover o uso da lingua galega entre a mocidade co fin de evitar a diminución no uso do galego nesta franxa de idade.
O IES Xulián Magariños de Negreira xunto co IES Luís Seoane de Pontevedra, co CPI Eusebio Lorenzo Baleirón de Dodro e co IES de Bertamiráns participou na fase final do Club de debate en Ferrol o pasado sábado, 5 de maio de 2018. Toda esta mocidade pasou o día a debater sobre se “As TIC favorecen o uso do galego”. Os equipos mantiveron un bo nivel e o xurado tívoo moi difícil para puntuar. Finalmente, o primeiro premio foi para o IES de Bertamiráns e o segundo para o IES Xulián Magariños.
Parabéns para todo este alumnado participante que é un exemplo de reflexión e intercambio de opinións en galego!!
O primeiro que aprenderon as persoas participantes neste obradoiro de regueifa foi que a regueifa serve “para dicir en broma o que non se pode dicir en serio” tal como explicou Olalla Liñares, monitora desta actividade.
Todas as persoas alí presentes sabían o que era a regueifa e algunhas, incluso, recordaban ver, hai moitos anos, regueifar nas festas. Falando, falando, foron recordando un lote de cantigas que manteñen a mesma estrutura ca as coplas das regueifas. Aí van unhas cantas:
Indo para Santa Comba / metín un pé nunha poza, /agharreime a unha vella / pensando que era unha moza.
Nós aquí e vós alá /somos tantos coma vós, / nós comemos o carneiro / e os cornos son para vós.
Despedíronse de todos / e tamén do señor cura/ marcharon para a cidá /d’acabalo dunha burra.
Case todas as persoas botaron a súa regueifa e a aquelas que non se atreveron inventáronlle a súa entre todo o grupo; sempre seguindo o esquema dunha copla de oito versos que seguise a melodía e que rimase o segundo verso co cuarto en consonancia ou en asonancia. Velaí unha mostra desta improvisación.
Voulles dicir unha cousa /a estas mulleres da Baña / e tamén a estes homes /son a regueifeira Olalla.
Aprenderon varias melodías posibles para regueifar e puideron escoller entre a que máis lles acaía e ao final ata se atreveron a inventar unha especialmente para Olalla:
Pois moitas grazas Olalla / por nos vires ensinare / non te olvides que as da Baña / tamén queren regueifare.
Este xoves, 3 de maio de 2018, realizouse o primeiro Obradoiro de regueifa dirixido á mocidade. Neste obradoiro, impartido por Olalla Liñares, participou o alumnado do CPI San Vicenzo, concretamente o que cursa primeiro e segundo de ESO.
Foi este un primeiro intento por recuperar a regueifa que xa estivo presente hai moitos anos nesta comarca. Olalla, regueifeira da comarca, conseguiu manter a atención durante 90 min; ela destacou a participación do alumnado, o interese que mostrou en todo momento e o seu bo facer xa que conseguiron regueifar desde o principio.
Este foi o primeiro de tres obradoiros; no seguinte, o próximo mércores, 9 de maio, ás 18.00 h no centro social, van participar só persoas adultas e no último, o xoves, 11 de maio, ás 17.00 h, no centro social, interactuarán as distintas xeracións, as máis novas e as máis vellas.
Na comarca de Barcala tamén hai canteira de persoas regueifeiras!!!
