O pasado 26 de xuño de 2015, as familias que participan no programa Maimiños e Furabolos da Baña compartiron unha xornada de convivencia para despedir o curso 2014-15. Ese día os nosos pequenos e pequenas tiveron que madrugar porque a saída estaba marcada para as nove menos cuarto da Praza do Concello.
A primeira parada foi en Pontevedra. Alí, primeiro, as familias visitaron o Centro de Interpretación Torres Arcebispais (CITA) onde Olga, a encargada do CITA, tiña preparado un conto adaptado para xente miúda co que explicaba a historia de Pontevedra. Os cativos e as cativas non pestanexaban mentres ela ía cambiando de gorro dependendo da época da que estaba a falar. Quedaron sorprendidos mirando a maqueta da fortaleza, o foso defensivo, as bólas de pedra que se usaban como proxectís de catapulta…
Logo, achegáronse ata o teatro principal onde foron recibidas polo alcalde de Pontevedra, o concelleiro de normalización lingüística e a técnica deste servizo. As familias recibiron como agasallo unha bolsa con libros entre os que se atopaban dous dos Bolechas. Esta deferencia foi, un pouco, motivada porque o grupo dos Maimiños e Furabolos encadra dentro dos obxectivos do programa Apego no que A Baña e Pontevedra participan xunto con outros concellos.
Máis tarde, despois de merendar na praza de Ourense, comezaron a ruta dos Bolechas pola zona vella de Pontevedra acompañados por Roberto, o guía que tal parecía o frautista de Hamelín xa que os Maimiños e Furabolos se colocaron detrás del desde o primeiro momento e non se separaron ata que se despediu de tan engaiolados como os mantivo todo o tempo cos seus contos e xogos.
Ao mediodía tocou xantar e descansar na Illa das Esculturas e despois xogar no parque ata que volveron montar no autobús dirección Padrón, onde visitaron a casa-museo de Rosalía de Castro; ás cativas e aos cativos gustoulles a proxección que hai nunha das salas sobre unha mesa branca a modo de pantalla e, por suposto, xogar, merendar e relaxarse nos xardíns da casa nos que puideron coñecer distintas árbores e plantas.
Arredor das sete da tarde estiveron de regreso despois dunha xornada en que demostraron un comportamento propio de nenas e nenos grandes, a súa grande capacidade de aprendizaxe, de ilusión, de divertimento…
Grazas familias dos Maimiños e Furabolos pola vosa colaboración e dedicación! Vémonos en outubro coas pilas cheas de enerxía para afrontar un novo curso cheo de experiencias compartidas.